ہمیں ایسی دنیا میں رہنے کی کیا ضرورت ہے، جہاں حکمران اپنی مرضی سے ہم پر حکومت کر تے ہیں،بالی وڈ کی سابق کشمیری اداکارہ زائرہ وسیم کاکشمیریوں کی حالت زارپردکھ بھرا پیغام

شوبز

سرینگر(اے این این)بالی وڈ کی سابق کشمیری اداکارہ زائرہ وسیم نے کشمیر کے باشندوں سے متعلق انسٹا گرام پر ایک پوسٹ تحریر کی ہے جس میں کشمیری عوام کی حالت زار اور ان کے اظہار رائے پر عائد پابندیوں پر تشویش ظاہر کی گئی ہے۔زائرہ نے کشمیر کی زمینی صورتحال کا احاطہ کئی سوالات کی صورت میں کیا ہے اور ان کا جواب طلب کرنے کی کوشش کی ہے۔ ساوتھ ایشین وائر کے مطابق انہوں نے اپنے پوسٹ میں لکھا ہے کہ ہمیں ایسی دنیا میں رہنے کی کیا ضرورت ہے، جہاں ہماری زندگیوں اور خواہشوں پر قبضہ کیا جاتا ہے

اور حکمران اپنی مرضی سے ہم پر حکومت کر تے ہیں۔انہوں نے کہا کہ ہماری آواز کو خاموش کرنا اور اظہار رائے کو کم کرنا اتنا آسان کیوں ہے؟۔زائرہ وسیم نے کہا کہ ہمیں اظہار رائے کی آزادی کی اجازت کیوں نہیں ہے، ہمیں اختلاف رائے کا موقع دیا جائے تاکہ ہم اپنے خیالات کا اظہار کر سکیں۔انہوں نے سوال کرتے ہوئے لکھا کہ ایسا کیوں ہو رہا ہے کہ ہمارے خیالات کی ہر وقت مذمت کی جاتی ہے۔کیا اتنی شدت سے ہماری آواز کو روکنا آسان ہو گیا ہے؟ساوتھ ایشین وائر کے مطابق انہوں نے کہا کہ کشمکش اور دنیا کو اپنے وجود کی یاد دلائے بغیر سادہ زندگی کیوں نہیں گزار سکتے؟۔کشمیری اداکارہ نے کہا کہ آخر کیوں کشمیری عوام کی زندگیوں پر بحران، ناکہ بندی اور پریشانی کا سخت تجربہ کیا جا رہا ہے جس کی وجہ سے ہمارے دل و دماغ سے معمول اور ہم آہنگی کی شناخت ختم ہو رہی ہے؟پوسٹ میں زائرہ نے دنیا سے حقائق کی غیر منصفانہ نمائندگی پر یقین نہ کرنے کی درخواست کی ہے۔ جموں و کشمیر کے خصوصی درجہ کی 5 اگست سے منسوخی کے بعد کشمیر میں انٹرنیٹ بند رہا۔ 25 جنوری کو وادی کشمیر میں موبائل انٹرنیٹ خدمات بحال کر دی گئیں۔ساوتھ ایشین وائر کے مطابق گذشتہ برس جون میں زائرہ نے فلم انڈسٹری چھوڑنے کے اپنے فیصلے کا اعلان کرتے ہوئے سب کو چونکا دیا تھا کیونکہ وہ کام کے سلسلے سے خوش نہیں تھی۔ ان کا کہنا تھا کہ میں اپنے مذہب سے دور ہوتی جاری ہوں۔زائرہ آخری بار سونالی بوس کی ‘دی اسکائی ایز پنک’ میں نظر آئیں، ان میں اداکارہ پرینکا چوپڑا اور فرحان اختر تھے۔

اس وقت زیادہ پڑھی جانے والی خبریں

اس وقت زیادہ پڑھی جانے والی خبریں

اوپر